ការិយាល័យព័ត៌មាន(បុគ្គលិកប្រចាំការ)ទូរស័ព្ទ 092 464 205
គេហទំព័រ ផែនដីថ្មី ត្រូវការជ្រើសរើសបុគ្គលិកផ្នែកយកព័ត៌មានសរុបចំនួន២០០នាក់ នៅតាមខណ្ឌ ក្រុង និងស្រុក ដោយទទួលបានប្រាក់ខែតាមទំហំការងារ។
បន្ទាយមានជ័យ៖ពលរដ្ឋដែលជាជនរងគ្រោះប្រមាណចំនួន១០នាក់ បានសម្រេចនាំគ្នាដាក់ពាក្យប្តឹងចូលសាលាដំបូងខេត្តបន្ទាយមានជ័យ ដើម្បីទាមទាររកយុត្តិធម៌ ដល់ពួកគាត់ពាក់ព័ន្ធករណីទំនាស់ដីធ្លីទំហំ ១១៣ហិកតា ស្ថិតនៅចំណុចអូរស្វារអិល សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
យោងតាមពាក្យបណ្តឹងចុះថ្ងៃទី០៥ ខែសីហា ឆ្នាំ២០២០ បានបញ្ជាក់ថា ជនរងគ្រោះបានប្តឹងមនុស្សចំនួន ១៧នាក់ ដែលនៅក្នុងចំណោមនោះ ក៏មានលោក ប៉ាល់ សេដ្ឋា អតីតចៅសង្កាត់និមិត្ត, អភិបាលរងខេត្តបន្ទាយមានជ័យ លោក លី សារី អភិបាលរងខេត្តបន្ទាយមានជ័យ (អតីតប្រធានមន្ទីរសុរិយោដីខេត្តបន្ទាយមានជ័យ) លោក ង៉ោ ម៉េងជ្រួន អភិបាលរងខេត្តបន្ទាយមានជ័យ និងអតីតជាអភិបាលក្រុងប៉ោយប៉ែត លោក ប្រាក់ ប៉ូលី អតីតប្រធានមន្ទីរសុរិយោដីខេត្តបន្ទាយមានជ័យ (អតីតប្រធានការិយាល័យភូមិបាលក្រុងប៉ោយប៉ែត) ។
ក្រុមប្រជាពលរដ្ឋ បានប្តឹងអ្នកទាំង ១៧នាក់ពីបទក្លែងបន្លំឯកសារ, បទប្រើប្រាស់ឯកសារសាធារណៈក្លែង, បទបំភាន់មន្ត្រីសុរិយោដីក្នុងការចុះបញ្ជីដីធ្លី, បទសមគំនិតក្នុងអំពើក្លែងបន្លំឯកសារ, បទសមគំនិតក្នុងអំពើប្រើប្រាស់ឯកសារសាធារណៈក្លែង និងបទ សមគំនិតក្នុងអំពើបំភាន់មន្ត្រីសុរិយោដីក្នុងការចុះបញ្ជីដីធ្លី ។
នៅក្នុងពាក្យបណ្តឹងរបស់ប្រជាពលរដ្ឋ ក៍បានបញ្ជាក់ថា ប្រជាពលរដ្ឋចំនួន ៥១គ្រួសារ បានទទួលដីទាំងអស់នោះពីរដ្ឋចែក និងកាន់កាប់ចាប់តាំងពីឆ្នាំ១៩៩៧មកម្ល៉េះ លុះដល់ឆ្នាំ២០១៥ឈ្មោះ ទុយ វ៉ាន់នី ជាមេក្លោង និងបក្ខពួក បានលួចធ្វើប្លង់រឹងយកដីរបស់ប្រជាពលរដ្ឋ ដោយមានមន្ត្រីមូលដ្ឋាន និងមន្ត្រីជំនាញខាងលើជាអ្នកជួយជ្រោមជ្រែង សហការគប់គិតគ្នាបំភាន់ និងបន្លំឯកសារលួចចុះបញ្ជីយកដីរបស់ប្រជាជនទំហំ ១១៣ហិកតា យកទៅធ្វើជាកម្មសិទ្ធិដោយទុច្ចរិត។
នៅសៀលថ្ងៃទី១៤ សីហា ឆ្នាំ២០២០ គេហទំព័រ ផែនដីថ្មី មិនអាចរកការសុំបំភ្លឺតប ពីអស់លោកមន្ត្រីដែលរងការចោទប្រកាន់ពីពលរដ្ឋខាងលើ បាននោះទេ៕
