តាមរយៈហ្វេសប៊ុកផ្ទាល់ខ្លួន លោក ខៀវ កញ៉ារីទ្ធ បានសរសេរថា «ថ្ងៃមុនជួបមិត្តម្នាក់ដែលឈប់ធ្វើ «មេ» គេដូចខ្ញុំដែរ តែគាត់ថា គាត់មានអារម្មណ៍មួរម៉ៅ និង stress កូនចៅមិនដែលមកសួរសុខទុក្ខ មិនដែលអើពើ ហើយគាត់សួរខ្ញុំថា ហេតុអ្វីបានជាខ្ញុំមិនមានអារម្មណ៍ដូចគាត់?»។
លោកបាននិយាយបន្តទៀតថា «ខ្ញុំប្រាប់ថា ពេលនៅជាសិស្ស គ្រាន់តែប្រឡងចប់ភ្លាម ទោះជាមិនទាន់មានលទ្ធផលចេញយ៉ាងណាក្តី ខ្ញុំរៀបសៀវភៅទាំងអស់ដាក់ចូលប្រអប់ ទុកតុនៅទំនេរស្អាតអោយដាច់ចេញពីការរៀនសូត្រចាស់។ ពេលមកដល់អាយុនេះ ខ្ញុំមិនដែលសម្លឹងមើលទ្វារដែលបិទទេ ខ្ញុំសម្លឹងមើលទ្វារដែលកំពុងបើកថ្មីវិញ ហេតុនេះមិនមានពេល stress ទេ!»។
ដូច្នេះ មនុស្សគ្រប់គ្នាមិនត្រូវសម្លឹងមើលអតីតកាលដែលត្រូវបានបិទបញ្ចប់ទេ គេត្រូវសម្លឹងមើលអនាគតកាលថ្មីមួយដែលពោរពេញដោយឱកាស និងសេចក្តីសុខតាមរយៈ ការប្រតិបត្តិរបស់យើង។ មានការងារជាច្រើនដែលមនុស្សម្នាក់ៗអាចធ្វើបាន ដើម្បីខ្លួនឯង និងសង្គម។
ដូច្នេះ ចូរអ្នកសម្លឹងមើលទ្វារដែលបើកថ្មីនៅនឹងមុខ ហើយកុំងាកក្រោយសម្លឹងមើលទ្វារអតីតកាលដែលបានបិទទៅហើយ។
នៅក្នុងសង្គមខ្មែរយើង យើងសង្កេតឃើញថា មានអ្នកធំមួយចំនួនមានអារម្មណ៍មិនល្អ និងស្ថិតក្នុងស្ថានភាពស្ត្រេស បន្ទាប់ពីពួកគេបានចេញពីតំណែង។
តាមអ្នកស្រាវជ្រាវនិយាយថា បន្ទាប់ពីការចេញពីតំណែង ឬឈប់ធ្វើការ មនុស្សខ្លះមានអារម្មណ៍អវិជ្ជមាន ដូចជា ៖ ការអាម៉ាស់ កំហុស ការភ័យខ្លាច និងអារម្មណ៍នៃការបរាជ័យ។ដូច្នេះ ពួកគេអាចមានបញ្ហាសុខភាព ដោយសារតែផុងខ្លួននៅក្នុងអារម្មណ៍ស្ត្រេស និងអវិជ្ជមានទាំងនេះ។ ប៉ុន្តែ លោក ខៀវ កញ៉ារីទ្ធ អតីតរដ្ឋមន្ត្រីក្រសួងព័ត៌មាន បានលើកឡើងអំពីគំនិតដ៏ល្អមួយ ដើម្បីកុំអោយមានស្ត្រេស បន្ទាប់ពីការចេញពីមុខតំណែង៕
