United Kingdom ដែលយើងស្គាល់ជាទូទៅថា «ចក្រភពអង់គ្លេស និងអៀរឡង់ខាងជើង» ឬហៅកាត់ថា «ចក្រភពអង់គ្លេស» ត្រូវបានប្រែសម្រួលថ្មីជាភាសាខ្មែរ ដោយដូរទៅជា «រាជាណាចក្ររួមនៃព្រីតថេន និងអៀរឡង់ខាងជើង» ឬ ហៅកាត់ថា «ព្រីតថេន»។
បើតាមការចុះផ្សាយរបស់ស្ថានទូតព្រីតថេន នៅថ្ងៃទី៣០ ខែកក្កដា ការផ្លាស់ប្តូរនេះ មានសារសំខាន់ ដោយវាឆ្លុះបញ្ចាំងពីអត្តសញ្ញាណ ប្រវត្តិសាស្ត្រ និងចំណងទំនាក់ទំនងដែលប្រទេសទាំងពីរចែករំលែកជាមួយគ្នា។ «ការកែសម្រួលនេះត្រូវបានធ្វើឡើងតាមរយៈការពិគ្រោះយោបល់ជាមួយអ្នកជំនាញភាសាខ្មែរ រាជបណ្ឌិត្យសភាកម្ពុជា និងទទួលបានការអនុម័តពីក្រសួងការបរទេស និងសហប្រតិបត្តិការអន្តរជាតិ»។
សេចក្តីប្រកាសព័ត៌មានបញ្ជាក់ថា ឈ្មោះភាសាខ្មែរថ្មីនេះឆ្លុះបញ្ចាំងបានកាន់តែច្បាស់អំពីអត្តសញ្ញាណរបស់រាជាណាចក្ររួមនៃព្រីតថេន និងអៀវឡង់ខាងជើង ដែលមានប្រជាជាតិបួន និងរចនាសម្ព័ន្ធនយោបាយទំនើបរបស់ United Kingdom។
United Kingdom មានឈ្មោះផ្លូវការពេញជាភាសាអង់គ្លេសថា The United Kingdom of Great Britain and Northern Ireland។ «បច្ចុប្បន្នភាព និងទំនើបកម្មដោយបកប្រែជាភាសាខ្មែរថ្មីនេះ ឆ្លុះបញ្ចាំងកាន់តែត្រឹមត្រូវអំពីរចនាសម្ព័ន្ធនយោបាយបច្ចុប្បន្នរបស់ចក្រភពអង់គ្លេសដែលជារាជាធិបតេយ្យអាស្រ័យរដ្ឋធម្មនុញ្ញ និងការពិតដែលថាវាជាសហភាពនៃប្រទេសចំនួន៤រួមបញ្ចូលគ្នា គឺអង់គ្លេស ស្កុតឡែន វែលស៍ និងអៀរឡង់ខាងជើង។ ទម្រង់ខ្លីគឺ ព្រីតថេន»។ នេះបើតាមសេចក្តីប្រកាសព័ត៌មាន។
លោក Dominic Williams ឯកអគ្គរាជទូតនៃ British Embassy ប្រចាំកម្ពុជា បានមានប្រសាសន៍ថា៖ «ខ្ញុំពិតជាមានសំណាងណាស់ដែលបានរៀនភាសាខ្មែរក្នុងរយៈពេលដ៏វែងមួយ ហើយមានការគោរព យ៉ាងជ្រាលជ្រៅចំពោះសារសំខាន់ជាមូលដ្ឋានរបស់ភាសាខ្មែរនៅក្នុងវប្បធម៌កម្ពុជា។ ខ្ញុំជឿជាក់យ៉ាង មុតមាំក្នុងការរក្សាភាសាដ៏រស់រវើកនេះ»។
លោកបានបញ្ជាក់ថា ពេលលោករៀនពាក្យខ្មែរដែលបកប្រែសម្រាប់ប្រទេសលោកជាលើកដំបូង លោករកឃើញថា ពាក្យខ្មែរដែលប្រើ នៅពេលបកប្រែជាភាសាអង់គ្លេស មិនបានឆ្លុះបញ្ចាំងពីភាពចម្រុះ និងទំនើបរបស់ United Kingdom ឬអត្តសញ្ញាណផ្ទាល់ខ្លួនរបស់លោកទេ ក្នុងនាមជាមនុស្សដែលមានអត្តសញ្ញាណផ្ទាល់ខ្លួន មកពី អង់គ្លេស អៀរឡង់ខាងជើង និងវែលស៍។
«ខ្ញុំសង្ឃឹមថា ការបកប្រែថ្មីនេះ នឹងដើរតួនាទីតូចមួយក្នុងការបង្កើនមិត្តភាព និងការយោគយល់គ្នាទៅវិញទៅមករវាងប្រទេសដ៏អស្ចារ្យទាំងពីររបស់យើង»។ នេះជាជំនឿដ៏មុតមាំរបស់លោកឯកអគ្គរាជទូត៕
